Interview mit Jakob Dellago

Der Regisseur von "Rache" - eingeladen zum Internationalen Jugend-Medien-Festival in Wels

19. November 2016

Worum geaht's im Film "Rache" überhaupt?

Es geat um ah sehr junge Frau, de wos reihenweise Mander umbring. Sie werd donn logisch gschnappet und erzählt in an Filmteam die Motive ihrer Taten.

Wie bisch du auf des Thema kemmen?

Am Unfong wor des eigentlich gonz onders geplant gewesen, i hon amol an Obend nix zu tian kop und do Tom hot schun öfter noch an nuin Drehbuch gfrog. Also hon i mi hingsessen und mir grob in Ablauf von der Gschichte ausgedenkt. Logischerweise hot der sich in die nächstn Toge und Wochn noamol stork verändert.

Hot sich die Idee bei die Dreharbeiten geändert?

Na, im groaßen und gonzen eigentlich net. Mir hobn holt net soffl wichtige Toale weglossen gemiasst weil mo koane Zeit mehr dafür kop hobn

Welche Schwierigkeiten und Überraschungen sein beim Filmdreh aufgetreten?

Also, i glab i hon mir des awian zu leicht vorgstellt und gedenkt do isch ah Kamera und Schauspieler und nor wert des schun lafn. Doweil isch des donn decht net soffl leicht wenn auf oanmol ah gonzes Team von Kameraleit, Tonmänner, Bühnenbildner, Zuaständige für die Requisiten usw. vor dir steaht und du olle umanondokommandiern und ihnen eps zu tian gebn muasch. 

Hot di die Entscheidung vom YOUKI-Teams überroscht, deinen Film zum Festival inzulodn?

Ehrlich gsog hat i mir sel net unbeding erwortet, weil der Film in meine Augen a bissl a Flop geworden isch. Deswegn hon i ihn ah net gern hergezoag und i bin mir netamol sicher ob olle Schauspieler es "Endprodukt" ihrer Orbeit überhaupt schun amol gsegn hobn :D

I wor also schun abissl überroscht sobold i gheart hon dass ins die Ehre zuteil geworden isch, mit insern Film noch Wels zu fohren.

Wos wersch du bei dein nächsten Film sicher onders mochen?

Im Vorhinein viel viel mehr Energie in die Organisation stecken und olles so konkret wie meglich zu planen, dass donn beim Dreh koane schwerwiegenderen Probleme auftreten.

Wo liegen die Stärken von deinem Team?

Die greaste Stärke isch sicher dass mir ins olle guat kennen und ah außerholb vom "Filmbusiness" guat mitanonder auskemmen. Außerdem orbeiten mir schun länger zommen und jeder hot aufn Set mehr oder wianiger seine Orbeit, bei der er sich super auskennt.

Über mi:

Hobbies hon i an Haufn, i tua in an Verein Fuaßbollspieln und sel nimmp schun an Groaßteil meiner Zeit. I bin sogor amol wegn an Fuaßbollspiel, wos beim Drehplan dazwischen kemmen isch als Regisseur ausikaut wordn. Donn tua i, wer hats geglab, no gern Filme mochen und seit lestn Johr bin i ah bei do Theatergruppe Zitronengelb dabei. Und wenn i sust no Zeit hon zeichn i gonz gern dahoam. Und Hausaufgoben sein logisch meine Lieblingsbeschäftigung, obo sel kriagmo leido net soffl viele ;)

Jetzt hon i schun soffl viel über meine Hobbies erzählt, i glab jetzt isch koan Plotz mehr für Träume, Ziele, Interessen und Lieblingsfilme, sust wert des no ah gonzer Roman.

Welche Beruafe im Filmbereich reizen di am meisten?

Regisseur isch bis jetzt eigentlich meine Lieblingsaufgobe beim Filmen. Sem geats oanfoch drum die Gschichte so umzusetzen, dass sie als Film gezoag werdn konn. Man isch ah es Bindeglied zwischen Schauspieler und Filmcrew und i find de Zusommenorbeit oanfoch volle sponnend.

In viele werd sicher Kameramonn ah guat gfolln, obo i muas zuagebn, obwohl i jetzt schun übo 3 Johr beim Filmen dabei bin, hon i de Kameras olm no net gonz durchblickt :D

Wo sigsch du di in 10 Jahren?

Puhh, i woas no net amol wo i mi in 1 Johr sig, deswegn isch de Froge net so leicht zu beontworten ;)

Wos sein deine nächsten Filmvorhaben?

Also grod isch volle ah cooler Film geplant. I will net zu viel verroten, denmol isch holt viel viel mehr Zeit in die Vororbeit gsteckt wordn und olls isch dementsprechend strukturierter und klarer und vielleicht kemmo mit den nächsts Johr jo no weiter als Wels ;)